2Ti 3 | MED | STEP | Nim pilkᵾn muⱡi! Ui pora nimba ei kᵾn, uⱡ mindil nui mat ou ndupa omba. Wamp mbᵾ, en enim ou nduk numan ngok, mel mbᵾ mok rui narᵾk, en enim nga kᵾng orunga mel mbᵾ nga ou nduk pilik, ku moni minal numan ngok, en enim nga kaip nᵾndᵾk iting. Kara pok, Got tᵾk ik kuldᵾk, tipam mamᵾl nga ik tᵾk roi nduk, Got kᵾn angge nandᵾk, uⱡ wingti mbᵾ, tᵾk mbᵾⱡ nguing.

2 Timothy 3

Uⱡ Kit Mbᵾ Ui Pora Nim Ei Kᵾn Ekit Omba

1 Nim pilkᵾn muⱡi! Ui pora nimba ei kᵾn, uⱡ mindil nui mat ou ndupa omba. Wamp mbᵾ, en enim ou nduk numan ngok, mel mbᵾ mok rui narᵾk, en enim nga kᵾng orunga mel mbᵾ nga ou nduk pilik, ku moni minal numan ngok, en enim nga kaip nᵾndᵾk iting. Kara pok, Got tᵾk ik kuldᵾk, tipam mamᵾl nga ik tᵾk roi nduk, Got kᵾn angge nandᵾk, uⱡ wingti mbᵾ, tᵾk mbᵾⱡ nguing. 3 Wamp mbᵾ, uⱡ kai mbᵾ iti natᵾk, wote wamp mat kont kuⱡi nalk, wamp ik mbuldung nᵾndᵾk, en enim nga mul orunga rᵾp iti natᵾk, wote uⱡ kai mbᵾ, numan ngui nganggᵾk iting. 4 Wamp mat, rok kunding mbᵾ nga ruk molk, omba numan ingk mat pili napilik, wote numan meka rui ei ndi, wamp mbᵾ kᵾn peka romba. Kᵾng orunga iting uⱡ mbᵾ, numan minal ngok, Got numan ngui ngᵾnging. 5 Got nga uⱡ mbᵾ, kᵾng orunga mint ambulk molk, Got nga uⱡ ronduⱡ kupa mbᵾ wak rok, tᵾk mbuⱡ ngok, wu i etpa mbᵾ kandkᵾn, ok tᵾkᵾn muⱡi! 6 Wu mbᵾ nga mat, wamp mat nga manga mbila puk, amp numan kun etpa pi napᵾtᵾm mbᵾ kandᵾk, ik kol rok ngurmin. Amp mbᵾ, en enim nga unt uⱡ kit na, wote numan kit na mbᵾ ndi, en enim nga numan orunga peka roⱡnga, uⱡ kit mbᵾ numan ila peka rorum. 7 Amp mbᵾ, ik pili nᵾpiling, wote ik kupa ei, pilik mbi ndui nᵾnding. 8 Ei wote, wu Janis kᵾn Jambres raⱡ, ik kupa ei, tᵾk mbuⱡ ngokᵾⱡ, Moses kᵾn kapⱡa mendkᵾⱡ el rorᵾnggil. Ei mel ku, wu elpa mbᵾ nga numan kai mat mon. Omba wote, nondpa pili kupa mat, tek muⱡi nambᵾrmᵾn. 9 Wamp kit i etpa mbᵾ nga kongun eng uⱡ mbᵾ, mba ruⱡ pi napᵾmba. Wu Janis kᵾn Jambres raⱡ kᵾn pitim ni mel, wamp kit mbᵾ nga uⱡ wᵾlᵾ eng mbᵾ, kandᵾk poⱡ nduing.

Man Ik Ronduⱡ Kᵾⱡ

10 Wote, nim na nga man ik ei kᵾn, ik nᵾmp, nombuⱡa andᵾp, numan pilip et uⱡ mbᵾ, nim pep ron. Wote, na nga mondpa pili uⱡ, pilpa ment ndui uⱡ, wamp numan ngui uⱡ, wote wamp ndi, na mbun nguⱡungina, mbun tᵾp ronduⱡ mbo mor uⱡ mbᵾ kᵾn, wote kᵾng orunga mindil ngormᵾn uⱡ mbᵾ, nim pilkᵾn poⱡ ndukᵾn morᵾn. Nim pilik morᵾn ei, na wil Andiyok kᵾn Aikoniyum, wote Listra kona kᵾⱡ ila, na rok kunding pilik etᵾng ni, Nuim ei ndi, na tᵾpa rᵾpᵾndrᵾm. 12 Wamp nam ti, Kraist Jisas kᵾn rᵾmp ndupa moⱡpa, wote Got kᵾn mint muⱡimp nimba pᵾtᵾm wamp ei, mbun mindil kit mbᵾ ting. 13 Wu kit mbᵾ kᵾn, ik mbo wu kol na mbᵾ, en enim ik kol rok rukᵾr titmin ei mel, wamp puⱡi ik kol rok nguⱡina, wote en enim kᵾn wamp mbᵾ kᵾn pora, uⱡ kit ila mana purmin. 14 Wote, nim ik ei pilkᵾn morun. Nim unt kang kel murᵾn ei kᵾn, Buk Wingti ik kᵾⱡ pilkᵾn morᵾn. Ya buk ila nga, nim pilpa kungundi kai mat ngorum. Ei nga, nim Kraist Jisas mondkᵾn pilkᵾn muⱡana, Got ndi, nim etpa tᵾmba. 16 Buk Wingti ila petᵾm ik mbᵾ, Got ndi, nimba nguⱡnga, mon rorung. Ik ronduⱡ kᵾⱡ, tᵾn numan kai mbo rondpa, uⱡ ⱡawa etmin mbᵾ, etpa mot ndupa, wote tᵾpa kun mundpa, moⱡpa kundi orunga muⱡmin ei mel, man ngorum. 17 I etᵾm uⱡ ei ndi, Got nga kongun wamp ei, kongun kai elpa elpa mbila, etpa mura mondrum.